काठमाडौं । मिड–भ्याली इन्टरनेशनल कलेजले “व्यवस्थापन र सूचना प्रविधिमा दिगो विकासका लागि नवीन व्यवसायिक अभ्यासहरू” विषयक राष्ट्रिय सम्मेलन सफलतापूर्वक सम्पन्न गरेको छ। यस सम्मेलनले शैक्षिक आदान–प्रदान, अनुसन्धानको प्रचार–प्रसार तथा पेशागत सञ्जाल निर्माणका लागि एक सशक्त मञ्चको सिर्जना गरेको छ।
सम्मेलनको शुभारम्भ प्रमुख अतिथि रितल राणाको स्वागत मन्तव्य र उद्घाटन भाषणसँगै भएको थियो, जहाँ उनले व्यवसाय तथा प्रविधि शिक्षामा नवप्रवर्तन र दिगोपनको एकीकरणको महत्त्वमा जोड दिइन् । विशेष अतिथि सुरिना गुरुङले समसामयिक चुनौतीहरू समाधान गर्न सक्षम भावी नेतृत्व निर्माणमा शैक्षिक क्षेत्रको भूमिकाबारे प्रकाश पारिन् ।
सम्मेलन संयोजक डा. पदम डंगोल को संयोजनमा आयोजित कार्यक्रममा देशभरका विज्ञ विद्वान, व्यवसायिक विशेषज्ञ र विद्यार्थीहरू उपस्थित थिए। प्रमुख वक्ता डा. महेश महर्जन (सूचना प्रविधि) र डा. हरिराज रजौरे (व्यवस्थापन) ले व्यवस्थापन अभ्यासको बदलिंदो स्वरूप, प्रविधिगत प्रगतिहरू र दिगो विकास हासिल गर्न तिनीहरूको भूमिकासम्बन्धी महत्वपूर्ण दृष्टिकोण प्रस्तुत गरे ।
दिनभरका सत्रहरूमा व्यवस्थापन, सूचना प्रविधि, आतिथ्य तथा पर्यटन क्षेत्रमा दिगो र नवप्रवर्तनात्मक व्यवसायिक रणनीतिमा केन्द्रित गहन छलफलहरू भए। मिड भ्यालीको अनुसन्धान विभागले सावधानीपूर्वक छनोट गरेका १५ उत्कृष्ट अनुसन्धान पत्रहरू मात्र प्रस्तुतिका लागि स्वीकृत गरिएका थिए, जसले शैक्षिक संवादलाई समृद्ध र सान्दर्भिक बनायो।
